km6: nove sito litterari de oficia.tk

7.4.10 al 02:27
 
______km6

    Le kilometro sex del avenue del vita es le kilometro del retorno e del non-retorno, del incontro e del disincontro, del puncto de inflexion del linea vital, del concordia e del discordia al prejudicios e sapientias proprie e alien.  Le kilometro definitive ubi le esser selige esser heroe tragic o heroe comic. Definitivemente, le instante le plus importante super tote le altere momentos.

    Basate in le projecto del pagina septimanas.blogspot.com que claudeva in duo septimanas post su initio, Km6 es un plataforma litterari ubi le collaboratores de OFICIA experimenta le creation de parve textos personal e fictional ubi le lectores pote seliger le stylo que les place le plus in un inquesta permanente. 

    Temporalmente on selige un thema e cata un de iste sex scriptores del sex continentes del mundo elaborara un texto in interlingua. Le prime texto que illes ha create es  basate super alcun experientia personal relationate con lor citates pro que le lector potera identifica les con lor locationes. Assi il ha un scriptor in San Diego (SUA), Sao Paulo (Brasil), Valencia (Espania), Saint Denis (Insula del Reunion, Francia), Seoul (Corea del Sud) e Sidney (Australia).

    Le collaboratores ha preferite le anonymia usque le momento que le projecto poterea devenir interessante pro le lectores del pagina. 

    Le collaboratores de OFICIA amicalmente vos desira un bon lectura de km6:
   

Le scopo de OFICIA e de "Le Saisonal".

2.4.10 al 18:51
    Como on pote exprimer le realitates actual de un mundo in constante cambio e profundemente globalisate ubi le frontieras deveni cata die minus obvie? Como on pote provider un vision scientific o objective de isto si le personas  generalmente ha prejudicios ferree? Esque OFICIA sequera le "mainstream" o le "underground"? Esque  un equipa tanto juvene, variate e international potera arrivar a un conclusion conjuncte super le realitates que nos circunfere? Esque interlingua es le lingua adequate pro diriger se al mundo?
 
    Iste questiones es parte del debattos que le equipa de OFICIA ha planteate in su recente incontros virtual. Le question es si le scopo de interlingua es exclusive, in altere parolas,  pro romanophonos e personas que lo ha studiate durante annos o si, per altere latere, illo es un instrumento inclusive pro tote le personas qui considera interlingua un standard anglo-romanic simplificate capace de connectar al mundo linguisticamente.

    Confidente que interlingua es inclusive, e anque neutral (perque non prevale super le linguas national) e pluralistic (interlingua non ha un philosophia o doctrina implicite), nos ha formate un equipa de un decena de personas de differente zonas geographic, con su prejudicios personal e cultural, ma con le intention de promover le usage de interlingua e de exprimer in iste lingua un vision del mundo  del  maniera le plus objective possibile, sequente le principios del methodo scientific in le travalios monographic e plus liberemente in le scriptos litterari.

    "Le Saisonal" vade tras le anno guidate per le saisones, personificate sequente le tradition europee del quatro elementos: Vera es una puera african qui representa le terra,  Tate es un juvene asiatic vestite in foco; Tumno es un femina amerindian de capillos aeree; e Berno es un anciano europee de oculos aquatic.

    In le ordination del magazin on prende como patron le numero quatro, e finalmente illo essera dividite in quatro sectiones (politica e economia, scietias e technologia, otio e sportes, e arte e litteratura).

    Si tu vole reciper un monstra del magazin in formato pdf, invia un message via e-posta solicitante lo a oficia@live.com.

    Nos spera que tu trovara iste projecto utile e interessante. Amicalmente, le equipa de OFICIA (Organisation pro le Fomento Internationeal de Cultura in Interlingua).

OFICIA | Powered by Blogger | Entries (RSS) | Comments (RSS) | Designed by MB Web Design | XML Coded By Cahayabiru.com